Contoh Satua Bahasa Bali I Durma

Inggih sedurung titiang ngaturang satua pinirihin ngaturang pangastung kara

                                    ”Om Swastyastu”

Suksma majeng ring pengenter acara antuk galah sane katiba ring titiang.

-Angga tim panureksa pacentokan masatua bali sane dahat wangiang titiang

-Para pamilet pacentokan sane tresna sihin titiang

-Taler pamiarsa pacentokan sareng sami sane kusumayang titiang.

Sane mangkin titiang jagi masatua, mungguhing bantang murdaning satua sane jagi katur wantah:  I DURMA

Ada tuturan satua anak muani bagus madan Irajapala makurenan ngajak dedari madan Ken Sulasih. Ia nongos di desa Singapanjaron. Ia ngelah pianak adiri adanina I  Durma. Mara I Durma matuuh pitung oton,kalahina teken memenne mawali ka Kendran.Sawireh keto, Idurma kapiara,kapretenin olih I Rajapala,kanti matuuh dasa tiban. Gelisang satua, I Rajapala makinkin bakal nangun kerti ka alas gunung.

            Nuju sanja, I Rajapala ngaukin pianakne laut negak masila. I Rajapala ngusap-usap duur I Durmane sarwi ngomong ”Duh, Cening Durma pianak Bapa, tumbuh cening kaasih-asih pesan. Enu cerik Cening suba katinggalin baan meme. Buin mani masih bapa bakal ninggalin Cening luas ka gunung alas nangun kerti. Jumah cening apang melah.

            Mara keto, jengis I Durma, paningalanne ngembeng-ngembeng, tumuli ia makakeb di pabinan bapanne. Tusing  nyidayang ia masaut. Bapanne menehang tegak Durmane tur nutugang mapitutur. ”Cening Durma, awak enu cerik, patut cening seleg malajahang awak. Sabilang gae patut plajahin, nyastra tusing dadi engsapin. Ditu di pasraman jero dukuh, Cening malajah sambilang ngayah.

            Plajahin Cening matingkah, ngomong muah mapineh.Tngkah, omong muah papineh ane rahayu palajahin. Melahang solahe mabanjar, mapisaga, eda maguunin rusit teken timpal. Patut Cening asih manyama braya. Nyama brayane pinaka meme bapa muah sameton, tur anggon lima batis. Sing nyen kaget Cening ngayah ka banjar  wiadin matetulung ka pisaga, eda pesan pesu mulihanga gegaen anake. Sekenang pesan magarapan ditu.

            Prade ada anak kumatresna, suka olas teken Cening, ento eda  pesan engsapanga. Nangin yen ada anak ngawe jele wiadin ngae jengah teken ukudan Ceninge, sasida-sidaan eda walesa. Minab Ida Sang Hyang Widhi tuara wikan nyisipang.

            Buina cening, semu ulate jejerang, kemikan bibihe apang manis, ento anggon ngalap pitresnan anake teken Cening. Plajahin ngomong ane rahayu, eda pesan cening ngae pisuna, ngadu ada, mamokak muah mrekak.

            Keto masih eda cening ngadu daya lengit, ngeka daya nyengkalain anak. Jejerang  pepinehe ngulati ane melah. Ingetang setata ngaturang bakti ring Ida Sang Hyang Widhi, matrisandhya tetepang.

            Nah, amonto Bapa mituturin Cening, dumadak Ida Sang Hyang Widhi Wasa Sueca mapica karahayuan tekening Cening muah Bapa.

            Tan kacrita pajalan I Rajapalane nangun kerti, kacrita jani I Durma suba ngayah, mlajah di pasraman Jero Dukuhe. Jero Dukuh kalintang ledang pakayunanne, krana I Durma seleg pesan mlajah tur enggal ngresep. I Durma tusing milihin gae, asing pituduh Jero Dukuhe kagarap kanti pragat. Sabilang peteng kaurukang masastra baan Jero Dukuh. Baan selegne malajh mamaca, dadi liu ia nawang satua, tutur muah agama.

            Sasubann I Durma menek truna, pepes ia ka bencingah, dadi tama ia nangkil ring Anake Agung di Wanakeling. Para punggawa, tandamantri pada uning, tur sayang teken I Durma. Ditu laut I Durma kaanggen parekan di puri, kadadiang panyarikan sedahan agung purine. Dadinne, I Durma tusing kuangan pangan kinun muah stata mapanganggo bungah. Yadiapin keto tusing taen ia engsap manyama braya, satata inget teken pitutur bapanne muah ajah-ajahan Jero Dukuhe. Keto nyen pikolih anake jemet mlajah tur anteng magarapan.

Kesimpulan :

Inggih ida dane pamiarsa sareng sami lan pamekas timpal-timpal tiang sareng sami kadi asapunika titiang ngaturang satua bali sane mamudra I DURMA.

Pikenoh sane munggah ring carita sane wawu inggih punika :

            I Durma anak cerik ubuh kapiara teken bapanne, disubne gede I Durma jemet mlajah tur nglaksanaang sane mawasta Tri Kaya Parisudha inggih punika solah tetiga sane becik sekadi mapineh, ngomong miwah malaksana ane beneh muah rahayu.

            Minabda wenten kirang langkung mungguhing paribasa titiang gumanti mangda prasida ngampurayang.

Titiang mapamit sakeng ajeng ida dane sareng sami puputang titiang antuk ngaturang parama santi ”Om Santhi Santhi Santhi Om”

Tweet

Postingan terkait:

— Tuesday, October 15, 2013 — Add Comment — Pelajaran Agama